Халқаро футбол ассоциациялари федерацияси (ФИФА) бугун дунё терма жамоаларининг ноябрь ойидаги рейтинг жадвалини эълон қилди.

Ўзбекистон терма жамоаси мазкур ойда Сурия ва Ироққа қарши ўртоқлик ўйинларини ўтказиб, ҳар иккала учрашувда ютқазган эди. Натижада миллий жамоамизнинг баллари 9тага камайиб, 1283 баллни ташкил қилди. Оқибатда Ўзбекистон бир поғона пастга тушиб, 85-ўринни банд этди.

Осиё қитъасида 12-ўринни эгаллаб турибди. Қитъамизда Япония (27-ўрин), Эрон (29), Жанубий Корея (38), Австралия (41), Қатар (59), Саудия Арабистони (67), Ироқ (69), БАА (74), Хитой (75), Сурия (76) ва Уммон (82) терма жамоалари биздан юқори поғоналарни банд этишган.

Умумий рейтингни ҳам Бельгия терма жамоаси бошқариб турибди. Франция ва Бразилия кучли учликка, Англия ва Португалия термалари эса кучли бешликка киришган. Аргентина, Испания, Уругвай, Мексика ва Италия термалари топ-10га киришган.

ФИФА рейтинги (топ-10):

1. Бельгия (1780 очко)
2. Франция (1755)
3. Бразилия (1743)
4. Англия (1670)
5. Португалия (1662)
6. Испания (1645)
7. Аргентина (1642)
8. Уругвай (1639)
8. Мексика (1632)
10. Италия (1625)

Осиё мамлакатлари рейтинги:

27. Япония (1502)
29. Эрон (1496)
38. Жанубий Корея (1465)
41. Австралия (1457)
59. Қатар (1387)
67. Саудия Арабистони (1353)
69. Ироқ (1347)
74. Бирлашган Араб Амирликлар (1326)
75. Хитой (1323)
76. Сурия (1313)
82. Уммон (1303)
85. Ўзбекистон (1283)