Кеча бўлиб ўтган АГМКга қарши Кубок ўйинидан сўнг "Локомотив" учун навбатдаги футбол мавсуми ўз якунига етди.
Бугун клуб қароргоҳида "Локомотив" ПФК раҳбарияти жамоамиз аъзолари билан учрашиб, якунига етган мавсум ҳақида ўз фикрларини билдирди ва кейинги режалар борасида кичик йиғилиш ташкил этилди.
Бу мавсум "темирйўлчилар" учун осон ўтмади. Ўзига хос синовли йил бўлди десак янглишмаймиз. Жамоамиз айниқса биринчи даврадан кейин мураккаб ҳолатга тушиб қолганди. Шу боис вазиятни ўнглаш ҳамда жамоани юқори ўринларга кўтариш мақсадида иккинчи давра олдидан мураббийлар штабига Тимур Кападзе таклиф этилди.
Иккинчи даврани Андрей Микляев - Тимур Кападзе жуфтлиги қўл остида ўтказган "Локомотив" ижобий натижалар қайд этди. Бунда албатта Тимур Тоҳировичнинг меҳнати катта эканини айтмасак бўлмайди. Шу боис бугунги йиғилишда Тимур Кападзега клубимиз раҳбарияти томонидан эҳтиром кўрсатилди.
Ёш мураббий учун кечаги баҳс "Локомотив" мураббийи сифатида охирги ўйин бўлди. Эндиликда Тимур Тоҳирович бор эътиборини Ўзбекистон Ю-19 терма жамоасига қаратади. Хабарингиз бор, келаси йил март ойида Ю-19 Осиё чемпионати Ўзбекистонда бўлиб ўтади ва ёшлар терма жамоамизни мазкур мусобақага Тимур Кападзе тайёрлайди.
"Локомотив" ПФК Тимур Тоҳировичга чуқур миннатдорчилик билдирган ҳолда келгуси ишларига омад тилайди. Ўйлаймизки, Ўзбекистон У-19 терма жамоаси ушбу мутахассис қўл остида ўз мақсадига эришиб, У-20 жаҳон чемпионати ё‘лланмасини қўлга киритади.
