Ўзбекистон кубоги ярим финал доирасида "Насаф"ни мағлуб этган АГМК (1:0) жамоаси бош мураббийи Миржалол Қосимов қаторасига учинчи йил кубок финалига йўл олиш осон бўлмаганини таъкидлаб ўтди.

"Жуда ҳам оғир ўйин бўлди. Кубок доирасида осон учрашувнинг ўзи йўқ. Жамоа олдига финалга чиқиш мақсади қўйилганди ва буни уддаладик. Шогирдларимга миннатдорчилик билдираман. Қолаверса АГМКни қўллаб-қувватлаб турган минглаб мухлисларимизга ташаккур айтаман. Жамоага бўлган ишонч учун ишқибозларга раҳмат. АГМК энди финалга тайёргарлик кўради.

Ўйинга келадиган бўлсак, қизиқарли, шиддатли ва жанговор футбол бўлди. Кескин курашларга бой ўйин бўлди. Хато қилишга ҳаққимиз йўқ эди. Бундай даражадаги беллашувларда биргина хато ҳам қимматга тушишини билардик. Қолаверса "Насаф" жамоаси ҳам иккинчи таймда бор кучи билан ҳаракат қилди. АГМК эса танаффусдан кейин натижани сақлаб қолиш учун ҳаракат қилди ва буни уддалади.

Футболда аввалдан башорат қилиб бўлмайди. Ҳар бир жамоа ўз олдига мақсад қўяди ва шунга яраша интилади. Қаторасига учинчи йил финалга чиққанимиздан хурсандмиз. Бу осон бўлгани йўқ. Ниятимиз финалда муносиб ўйнаб, кубокни қўлга киритиш.

Йўқотишлар? Миржамол Қосимов, Санжар Турсунов ва Бобур Йўлдошевда жароҳат бор. Турсунов финалда ҳам жамоамизга ёрдам бера олмайди. Йўлдошев ва Миржамол Қосимов борасида шифокорлар кўригидан сўнг барчаси маълум бўлади. Ҳозир бир нарса дейиш қийин. Финалгача вақт кам. Бугунги ўйинда жароҳат олган футболчиларимизнинг ҳолатини эса эртага биламиз. Ният қиламанки, уларда барчаси жойида бўлади".