Stadion.uz Париж супер клубида бўлиб ўтаётган воқеалар ҳақида фикр алмашади.
ESPN нашрининг маълум қилишича, Париж клуби Томас Тухелнинг истеъфосини янги мураббийнинг тайинлови билан бир вақтда эълон қилмоқчи эди.Ички чемпионатдаги омадсизлик сабабли клуб сабр қилгани йўқ. Манбанинг маълум қилишича, клуб янги йилдан сўнг, янги мураббийни эълон қилишни режа қилган. Бу ким бўлиши эса, деярли аниқ.
Ваҳоланки, клуб сўнгги учрашувда «Страсбург»ни 4:0 ҳисобида мағлубиятга учратган эди. Раҳбарият эса, чемпионатдаги асосий рақиб «Лион»га қарши баҳсдан сўнг, мураббийга чиқиш эшикларини кўрсатиб юборишни режа қилган эди.
Маълумотларга қараганда, клуб нақд 2 ҳафта давомида Маурисио Почеттино билан музокаралар олиб борган ва уни кўндириши билан Тухелга чиқиш эшикларини кўрсатиб юборди. Тез орада, мураббийлар рокировкаси амалга оширилади. "Лига 1” 2 ҳафталик дам олишга чиқиб кетганидан, клуб унумли фойдаланишни режа қилган.
Тухел нега кетди?
Лоран Блан 3 йил давомида Париж клубида фаолият олиб борганига қарамай, уни истеъфога чиқаришди. Мураббий клубни чорак финалга олиб чиққан бўлсада, раҳбарият унга чиқиш эшикларини кўрсатиб юборди. Унай Эмери «Барселона»га қарши 1:6 дан кейин ҳам ўз ўрнини йўқотгани йўқ. Аслида, Томас Тухел ҳам ўзининг илк мавсумида «Манчестер Юнайтед»га қарши плей-офф учрашувида оғир мағлубиятни қабул қилиб олган эди. Шундай бўлсада, раҳбарият бунга кўз юмди.
Шундай бўлсада, Томаснинг ички биринчиликдаги катта ғалабаларини унутмаслик лозим. Клуб унинг қўл остида иккита чемпионликни қўлга киритди. Ҳатто Европа чемпионлар лигасини финал учрашувида ҳам тўп сурди. Айни дамда, клуб Франция чемпионатининг лидерларидан атиги 1 очко ортда қолмоқда холос.
Катта эҳтимол билан Тухелнинг истеъфосига асосий сабаб унинг жамоа етакчилари ва раҳбарият ҳақида билдирган фикрлар асосий сабаб бўлди. Айниқса, жамоанинг трансфер ишлари борасида билдирган фикрлари Леанардони хафа қилгани аниқ.
«Биз жуда кўп футболчиларни эркин агент сифатида қўйиб юборяпмиз. Бунга йўл қўйиш мумкин эмас. Бундай трансфер сиёсати билан келаси мавсумда рақобат киришиш осон бўлмаслиги аниқ.”
Кейин, ички муҳит бузилиб кетди. Неймар ва Мбаппе эса, мураббийнинг даражаси паст эканлиги ҳақида раҳбариятга бир неча маротаба маълум қилди. Бу қўзғолонга бошқа футболчилар ҳам қўшилди ва муаммо катталашиб кетди. Кейин эса, мураббий ва футболчилар ўртасидаги алоқалар тўлиқ тўққа чиқди. Ишга Носир Эл Ҳелайфи аралашгач, кимдир клубни тарк этиши аниқ бўлиб улгурди. ПСЖ ўз етакчиларидан айрилишни истамади. Шу боис, тинчгина Томас Тухелдан воз кечишга қарор қилди.
Кейинги мураббий ким?
Маурисо Почеттино варианти айни дамда ҳақиқатга жуда яқин. Аслида, мураббийни ишдан олиб ташлагач, Леанардо ўзи яхши таниш бўлган Макси Алегрини ишга таклиф қилмоқчи эди. Кутилмаганда, унинг қарорига Мансул Эл Хелайфи қарши чиқди. У 2001-2003 йиллар оралиғида клуб шарафини футболчи сифатида ҳимоя қилган Почеттино вариантини танлади. Бугунги кунда мураббий сифатида ном қозонган Маурисио ўз вақтида Париж супер клуби билан «Интертото» мусобақасида ғалаба қозонганини кўпчиликнинг ёдида бўлмаслиги мумкин.
Шу ўринда, Мансурнинг танловига қойил қолмасликнинг имкони йўқ. Аргентиналик мутахассис топ даражадаги мураббийлар қаторида тилга олинади. У совринлар ютмаган бўлсада, кичик имкониятлардан катта воқеа ясай олади. Бунга ҳеч кимда шубҳа йўқ. Унинг совринларга жуда ўч эканлиги эса, Париж клубининг катта ареналардаги имкониятларини ошириб юбориши аниқ. Таниқли нашрларининг маълум қилишича, парижликлар мураббийга 2023 йилга қадар мўлжалланган шартнома таклиф қилишмоқда. Совғасига Кристиан Эриксоннинг трансфери ҳам амалга оширилади. Миланда ўзини кўрсата олмаган Эриксон Почеттинони эркин ҳаракат қилишига имконият яратиб бериши аниқ.
Ташқаридан осон кўрингани билан, Почеттинони Парижда осон бўлмаган кунлар кутмоқда. У клубнинг ички муҳитини ўнглаши лозим. У жамоани жипслаштирибгина қолмай, тўлиқ бир муштга айлантириши лозим. БУнинг учун анчагина вақт талаб этилади.
Ўз фаолияти давомида фақат бой берилган финаллар билангина мақтана оладиган мураббий учун бу мушкул вазифа. Шунга қарамай, у энди ҳар мавсумни чемпионлик медаллари билан якунлаши, ўзига бўлган ишончини қайтариб олиши мумкин. Боз устига, агар бу тайинлов амалга ошса, уни ЙЧЛ доирасида «Барселона»га қарши ўйинлар кутиб турибди. Бу баҳсларда у «Эспаньол»га содиқ эканлигини кўрсатиб қўйиши лозим. Қўшимчасига, ўз имкониятларини ҳам тўлиқ намойиш этиши мумкин.
