Кеча тунда Англия Премьер-лигасининг 19-туридан ўрин олган «Лестер»- «Челси» ўртасидаги учрашув бўлиб ўтди. «Тулкилар» лондонликлар устидан 2:0 ҳисобида ғалаба қозониб, турнир жадвалида пешқадамга айланиб олди. Учрашувдан кейин мезбонлар вакили Жеймс Мэддисон ўз фикрлари билан ўртоқлашди.

“Биз тасодифан ёки қандайдир омад орқали бу ерга келиб қолганимиз йўқ. Қилаётган қаттиқ меҳнатларимиз учун шу даражага эришиб турибмиз. Одамлар «Юнайтед», «Ливерпуль», «Тоттенҳэм» ёки бошқа жамоалар ҳақида гапиришаётганлигини эшитишингиз мумкин, лекин майли улар ҳақида гапиришаверсин. Биз ўз ишимизни орқа томондан бажарамиз. Мавсум якунланганда ҳам биринчи ўринда бўлиш имконияти борлигига умид қиламиз. Албатта, ҳозир ажоиб ҳиссиётлар билан ўралганмиз, балки уйга борганимда турнинг жадвалини яна бир бор текширарман”, — деб ҳазил қилди «Лестер» футболчиси.