«Атлетико» Мадрид кеча Ла Лиганинг қолдирилган учрашуви доирасида «Атлетик» билан баҳс олиб борди ва 2:1 ҳисобидаги иродали ғалабага эришди.

Ушбу муваффақият жамоа бош мураббийи Диего Симеоне учун умумий ҳисобдаги 309 си ҳисобланиб, аргентиналик мутахассис бунга 514 та ўйин сарфлади. Симеоне бу натижаси билан клуб тарихида энг кўп ғалабага эришган мураббийга айланди. У бу йўлда Луис Арагонесни (612 ўйинда 308 ғалаба) ортда қолдирди.

Эслатиб ўтамиз, Диего клуб бош постига 2011 йилда келган бўлиб, мураббий бу орада бир мартадан Ла Лига, Суперкубок ва мамлакат кубоги, шунингдек, икки марта Европа лигасида зафар қучган.