"Ўзбекистон Профессионал футбол лигаси қошида ташкил этилган шифокорлардан иборат бўлган Комиссия украиналик мутахассис Попов Вячеслав Дмитриевич билан учрашув ўтказди. Суҳбат тарзида ўтган учрашувда ЎзПФЛ шифокорлари, футбол клублари шифокорлари, массажчи ва физиотерапевтлари иштирок этишди.
Ушбу учрашув Cоcа-Cола Суперлига тур ўйинлари вақти билан тўғри келиб қолгани ва бир нечта клублар мутахассислари жамоа билан сафарда бўлганликлари сабабли, учрашув параллел равишда Zoom платформаси орқали ҳам видео учрашув тарзида бўлиб ўтди. Суҳбат давомида спорт тиббиёти бўйича асосий масалаларга тўхталиб ўтилди. Ўйинлардан кейинги тикланиш жараёнлари, физиотерапия, тўғри овқатланиш замонавий футболда асосий масалаларга улгуриб айланган.
Вячеслав Попов Украина футбол ассоциацияси тиббиёт қўмитаси раиси, Украина миллий терма жамоаси ва бошқа спорт турлари шифокори каби танилган мутахассис ҳисобланади.", дейилади ПФЛ расмий сайтида.
