Мадриднинг "Реал" клуби учун бу мавсум омадсиз якунланиб, жамоа мавсум охирида бирорта ҳам соврин қўлга кирита олмаса "қаймоқранглилар" мураббийи Зинедин Зидан жамоани тарк этиши мумкин.

AS нашрининг хабар беришича, аргентиналик Маурисио Почеттино ПСЖга мураббий бўлиши мадридликлар режаларини ўзгартириб юборган. Чунки, Почеттино Зизу ўрнига асосий даьвогар эди. Шундай қилиб, Перес бошчилигидаги раҳбарият олдида иккита вариант қолди. Биринчиси – Германия терма жамоаси бош мураббийи Ёахим Лёв, у ёзда Бундестимни тарк этади. Иккинчиси – "Реал"нинг ёшлар жамоаси бош мураббийи ва жамоа афсонаси Рауль Гонсалес Бланко. У 2019 йилдан бери "Кастилья" мураббийи ҳисобланади.

Эслатиб ўтамиз, "қироллик клуби" айни вақтда Ла Лигада 28 ўйиндан сўнг 3-ўринни эгаллаб турибди. Шунингдек, клуб ҳали ЕЧЛда юришини давом эттирмоқда.