«Милан» ҳужумчиси Златан Ибраҳимович клуб билан шартномасини 2022 йил июнгача узайтиргани ҳақида фикр билдирди.
«Мен ҳар доим “Милан”ни менинг уйим деб айтганман. Агар мен бу ерда умримнинг охиригача тура олсам, унда мамнуният билан қоламан. Ўйлайманки, клуб мухлислари мен билан шартномани янгилаш ҳақидаги хабарларга ижобий муносабатда бўлишади. Агар келишимдан олдин кимдир шубҳа қилган бўлса ҳам, мен ёшнинг аҳамияти йўқлигини кўрсатдим.
Ҳаммаси менталитет билан боғлиқ. Мен ҳар доим яхшиланишни ва қўлимдан келган барча ишни қилишни хоҳлайман. Мен фақат ўзимни жисмонан яхши ҳис қилишни ва қўлимдан келганини қила олишни истайман. Мен барча ёш футболчиларга ёрдам беришга ҳаракат қиламан, бу менинг мотивациям. Ушбу ёш йигитларни ва уларнинг ривожланишини кўрганимда, бу менга адреналин беради. Биринчи келган кунимдан то шу кунгача уларнинг ҳар бирининг маҳорати яхшиланганини кўрдим», - дея футболчининг сўзларини келтирмоқда Football Italia.
