Ўзбекистон Coca Cola кубоги гуруҳ босқичининг 3-туридан ўрин олган “Навбаҳор” – “Олимпик” (1:0) учрашувидан кейинги матбуот анжуманининг иккинчи қисмида “Навбаҳор” жамоаси бош мураббийи Виктор Жалилов қатнашиб, ОАВ ходимларининг саволларига жавоб берди.

— Кўриб турганингиздек, ўйинлар осон кечмаяпти. Бугунги баҳсда гуруҳ етакчилари учрашишди. Ҳақли равишда қийин ғалабага эришдик. Ҳозир осон рақибнинг ўзи йўқ. “Олимпик” анча уюшқоқ, ўйини шаклланган жамоа. Рақиб таркибидаги футболчилар Суперлигада ҳам ўзларини кўрсатишга қодирлар. Уларнинг маҳорат, тезкорлик, тўп билан тўғри ҳаракатланишларини алоҳида эътироф этишим мумкин. Жамоамизнинг ўйини борасида тўхталадиган бўлсам, турли сабабларга кўра, барқарорликка эга бўлолмаяпмиз. Баъзилар жароҳат олишган, айримларнинг ўйини қовушмаяпти.

— Учрашув давомида сиз айрим шогирдларингиз, шунингдек, ҳакамларга ҳам  эътироз билдирдингиз, футболчиларнинг айримлари захира ўриндиғига олиш қарорингиздан хафадек кўринишди. Умуман олганда, жамоадаги муҳит қандай?
— Жамоамизда муҳит жуда яхши. Тўғри, айрим футболчилар қароримизни тўғри тушунишади, баъзилари эса йўқ. Кимдир уни фақат мақташларига ўрганиб қолган, бу ҳам психология масаласи. Аввал фаолият юритган жамоаларимда терма жамоа даражасидаги жуда кўплаб футболчилар, жумладан, Фарҳод Магометов, Одил Аҳмедов, шунингдек, Боян Миладинович сингари футболчилар тўп тепишган ва  улар танқидни тўғри қабул қилишарди. Ҳозир ҳам Игорь Голбан ёки Азимжон Аҳмедовга ниманидир баланд овозда тушунтирсам, тўғри тушунишади. Бу болалар футболи эмас, бу профессионал футбол, бу ерда очколар учун кураш боради. Шу боис, футболчиларимизга керакли талабларни қўямиз. Нимадир ўхшамаса, ўйиндан кейин таҳлил қилиб, йигитларга хатоларини кўрсатамиз.

Мен учрашув ҳакамига эътироз билдирмадим. Аксинча, ҳакамларга рақиб жамоа мураббийи эътироз билдирди. Захира ўриндиғида ўтириб, ҳадеб ҳакамга босим қилавериш яхши эмас, ахир.

— Сиз ўз вақтида “Навбаҳор”ни чемпион қилгансиз. Ўша чемпион бўлган “Навбаҳор” билан бугунги жамоа ўртасида қандай фарқ бор? Айни пайтдаги “Навбаҳор” нима учун чемпионлик учун кураша олмаяпти?

— Чемпион бўлган “Навбаҳор” билан бугунги таркибнинг ўртасидаги фарқ ҳақида айтсам, ўша пайтдаги жамоада Ўзбекистон терма жамоасига номзодлар жуда кўп эди. Бунга мисол тариқасида, Фарҳод Магометов, Илҳом Шарипов, Абдуқаҳҳор Маъруфалиев, Олег Шацких ва Зафар Мусабоев каби футболчиларни келтириш мумкин. Улар номзод эмас, миллий терма жамоанинг асосий футболчиларига айланиб улгуришганди. Ўша пайтдаги терма жамоанинг савияси анча баланд ва унинг таркибидан собиқ иттифоқ футболи мактабидан чиққан кўплаб кучли ўйинчилар, Сергей Лебедев, Андрей Фёдоров, Игорь Шквирин, Азамат Абдураимов, Миржалол Қосимов каби футболчилар ўрин олишган, бир сўз билан айтганда, миллий термада рақобат жуда кучли эди. Ҳозир эса бош жамоамизга номзод бўлган Азимжон Аҳмедов, Игорь Голбан, Тожикистон термасига номзод Эҳсони Паншанбе бор, холос.

Бундан кўринадики, футболчилар термага торта олишмаяпти. Футболчиларимизни кучсиз демайман, шунчаки, 1996 йилги “Навбаҳор” даражасига етиш учун янада кўпроқ ишлашга тўғри келади.

— “Навбаҳор”нинг қайси чизиғи сизни қониқтирмаяпти?
— Жамоа таркибидаги футболчилар бежизга “Навбаҳор” сафидан жой олишмаган. Улар “Навбаҳор”да ўйнашяптими, демак, Суперлига даражасидаги ўйинчилар саналишади. Менинг футболга ўз қарашим бор. Футболчиларимиз бир-бирларини тушунишлари, мен уларни тушунишим учун вақт керак. Бугунги таркибдан ўрин олганлар “Навбаҳор”га тасодифан келиб қолишмаган. Улар маҳоратли эканликлари  учун жамоада тўп тепишмоқда.

— Сўнгги ўйинларда сербиялик футболчилар учрашув қайдномасидан жой олишмаяпти. Бунинг сабаби нимада?
— Никола Тасич ва Славиша Стоянович жароҳатланишган. Стоянович  “Оқ-тепа”га қарши кечган баҳсда, Тасич эса машғулот пайтида жароҳат олишди.

Марко Путинчанин эса Cуперлига доирасидаги барча баҳсларда майдонга тушганлиги боис, унда юклама кўпайиб кетганди. Шу боис, чов соҳасида бироз оғриқ юзага келганлиги боис, унга “Оқ-тепа” билан бўлган ўйинда дам беришга қарор қилдик. “Зомин”га қарши кечган баҳсда эса  оилавий шароитга кўра, қатнаша олмади. Бугунги ўйинда эса мана майдонга тушди.

—  Олдинроқ Самвел Бабаяннинг “Навбаҳор”ни бошқариши борасида миш-мишлар чиққанди. Жамоанинг “Оқ-тепа”га қарши кечган баҳсини эса у бевосита стадионда кузатди. Бабаян ташқаридан сизга ўз маслаҳатларини бериб турадими?
— Миш-мишларга изоҳ бермайман. Самвел билан яхши муносабатдамиз. У билан тез-тез гаплашиб, маслаҳатлашиб турамиз. У ҳам мендан тавсия олиб туради. Муносабатларимиз яхши. Бошқа гап-сўзлар ҳақида ҳеч нарса билмайман.

— “Олимпик”нинг яхши шаклланган жамоа эканлигини таъкидладингиз. Келаси мавсумда мазкур жамоа футболчиларини устози Тимур Кападзе билан биргаликда “Навбаҳор”га таклиф этиш борасида нима дея оласиз? Шунда Тимур сиз билан биргаликда фаолият юритарди...
— Ҳақиқатданам “Олимпик”да маҳоратли футболчилар жамланишган. Шунингдек, Кападзенинг футболга ўз қараши бор. Бу фикрларни  “Олимпик”нинг олдинги ўйинларини ҳам кузатган ҳолда, айтяпман. Мураббийлар штабидаги ўзгаришлар ҳақида гап борганда, бу масала ҳар икки жамоа раҳбариятининг фикрларига қараб ҳал қилинади.

“Навбаҳор” ПФК матбуот хизмати.