УЕФА Европа мусобақалари учун меҳмондаги гол қоидасини тўлиқ бекор қилиш имкониятини кўриб чиқади, деб хабар бермоқда The Times.
Ушбу қоидани бекор қилиш 28-май, жума куни Портуда УЕФА клублар мусобақалари қўмитасининг йиғилишида муҳокама қилинади. Агар УЕФА клублардан етарлича қўллаб-қувватлов олса, ташкилот меҳмондаги гол қоидасини ўзгартириш жараёнини бошлайди.
Аввалроқ, апрель ойида УЕФА келаси мавсум учун меҳмондаги гол қоидасига катта ўзгартириш киритишни режалаштиргани ҳақида хабар берилганди.
Янги қоидаларга кўра, меҳмонда урилган голлар фақат иккала учрашувда асосий вақтга тўғри келади. Агар иккита учрашув якунида қўшимча вақт белгиланланган бўлса, меҳмонлар жамоасида меҳмондаги гол устунлиги бўлмайди.
Бундай таклиф Европанинг етакчи клублари томонидан қўллаб-қувватланди, меҳмондаги гол қоидасидан бутунлай воз кечиш таклифи эса рад этилди.
Амалдаги регламентга кўра, икки ўйинлик қарама-қаршиликда тенг ҳисоб бўлса, ўзга рақиб майдонида кўпроқ гол урган жамоа кейинги босқичга йўл олади.
