«Барселона» ва кросслар эсимни таниганимдан бери антоним бўлиб келади. Жамоа ҳатто стандарт вазиятларни ҳам майда пас билан давом эттирар, бош билан эса, фақат катта байрамларда (ЕЧЛ финали, масалан) урарди.

Ла лиганинг 5-тури доирасида бўлиб ўтган «Гранада»га қарши ўйинда (1:1) каталонияликлар 54 (!) кросс амалга оширдилар.

Бу нафақат Испания, балки АПЛ учун ҳам нормал ҳолат эмас. Масалан, 5-турда ҳеч қайси инглиз жамоаси бу рақамга олиб чиқмаган кросслар сонини. Бу тарзда тўп узатмаларни энг кўп амалга оширадиган «Ливерпуль» ҳисобида беш турда 150 кросс бор, яъни ўртача бир ўйинга 30 тадан тўғри келади.

Сўнгги турда Англияда энг кўп кроссни «Бёрнли» (41) амалга оширган. Гол уришнинг бошқа йўлини билмайдиган ғирт британ жамоа. «Бёрнли».

«Барселона» эса, бундай статистика юритила бошлагандан бери, фақат бир марта, 2005 йилда «Малага»га қарши кўпроқ кросс амалга оширган экан - 55 та.

Ушбу мавсумда ҳам бир ўйинда ўртача 10-15 бундай узатмалар амалга ошириб келган Куман шогирдлари ўйин услубини ўзгартирмоқчими, ё сабаб Люк Де Йонгнинг бир тайм майдонда ҳаракат қилганими ёки ҳаммаси шунчаки иложсизликданми, кейинги ўйинлар кўрсатади.

Дарвоқе, ягона гол Араухо томонидан бош билан урилди. Бошқа эҳтимол ҳам йўқ эди, манимча.

Қаҳрамон Асланов.