Футзал бўйича Ўзбекистон чемпионатининг янги мавсуми 9 октябрь санасида старт олади. Илк тур учрашувларига Фарғонадаги «Само» спорт комплекси мезбонлик қилади.

Маълумки, футзал учрашувлари сўнгги вақтларда асосан Тошкент, Олмалиқ ва Жиззах шаҳарларида ўтказиб келинаётганди. ЎзПФЛ футзални янада оммалаштириш йўлида қатор ишларни амалга оширди.

Жумладан, футзал чемпионати «Спорт» телеканали билан ҳамкорликда трансляция қилина бошланди. Шунингдек, футзал географиясини кенгайтириш орқали вилоятларда ҳам футзал спорт турини ривожлантиришга эришиш мумкин.

Ўтган йилнинг 1 декабрь куни ЎзПФЛ раҳбарияти Фарғона вилояти ҳокими Хайрулла Бозоров қабулида бўлиб, айнан шу масала хусусида фикр алмашганди. Натижада вилоят ҳокимияти кўмаги билан «Само» қопламаси алмаштирилди. Қўшимчасига, «Нефтчи» футзал клуби Олий лига йўлланмасини қўлга киритди.

Илк тур учрашувлари Фарғонада 9-14 октябрь кунлари бўлиб ўтади. Бунда ҳар куни 3 тадан учрашув ўтказиш режалаштирилган. Ўйинлар 15:00, 17:30 ҳамда 20:00 да старт олади.

Аввалроқ Олий лига учун қуръа ташлаш маросими 4 октябрь куни бўлиб ўтиши ҳақида маълум қилинганди.