Қуйида бир муддат илгари саудияликлар томонидан харид қилиб улгурган ва яқин орада суперклубга айланиши кутилаётган “Ньюкасл Юнайтед”га алоқадор бир қатор хабарларни қисқача келтириб ўтамиз.

Клуб “Милан” яримҳимоячиси Франк Кессие билан қизиқаётгани ҳақида Италиянинг Tuttosport нашри хабар берган. Айни вақтда хавбекнинг миланликлар билан шартнома муддати якунланиб бормоқда. Уни узайтириш бўйича эса хабарлар мавжуд эмас.

Англиянинг Мirror нашри хабарига кўра эса саудияликларнинг илк йирик хариди Ҳарри Кейн бўлиши мумкин. “Тоттенҳэм” ҳужумчиси учун 150 миллион евро таклиф этилиши мумкин.

Машҳур инсайдерлардан бири Кристиан Фалкнинг твиттерда ёзишича, “Ньюкасл” Тимо Вернер вариантини ҳам  кўриб чиқмоқда. Ҳозирда Вернернинг агентлари билан дастлабки  мулоқот олиб борилаётган бўлиши мумкин.

Sport.es нашрига кўра, “Барселона” ҳимоячиси Клеман Лангле “кўк-анорранг” либосни “оқ-қора”га алмаштириши мумкин. Ёзилишича, бу трансфер қишдаёқ амалга ошиши мумкин. Ҳозирда Каталон жамоасига футболчи бўйича сўров юборилган.

Худди шу нашр “Барселона”нинг бошқа бир аъзоси Филеппе Коутиньо ҳам инглиз жамоаси нигоҳига тушганини ёзмоқда.

"Ювентус" вакили Адриен Рабьо ҳам Англия жамоаси қизиқишлари доирасига тушган. Туринликлар уни қўйиб юборишга қарши эмас. Бу ҳақда Calcio Mercato нашри ёзган.

"Лестер Сити" аъзоси Уэсли Фофананинг эҳтимолий трансфери ҳақида ёзар экан инглиз нашрлари ҳатто аниқ рақамларни ҳам келтиришмоқда — 50 миллион евро.

Турли нашрларда тарқалаётган хабарларни умумлаштирсак “Ньюкасл” бош мураббийи Стив Брюс тез орада истеъфога чиқарилади. Унинг ўрнига келиши мумкин бўлган мураббийлар рўйхатида эса “Челси”нинг собиқ юлдузи ва мурабби Френк Лэмпард, “Рома”даги иши билан танилган Паолу Фонсека ва “Боруссия Дортмунд” собиқ устози Люсьен Фавр номлари мавжуд. Шунингдек, баъзи манбаларнинг ёзишича, "Лестер" устози Брендон Роджерс варианти ҳам "Ньюкасл"нинг янги раҳбарияти учун қизиқ кўринмоқда.

Кузатишда давом эмамиз!

Ориф Толипов.