"The Fight Site" журналисти Тэйлор О’Хиггинс бокс бўйича жаҳон чемпионатида 51 килограмм вазн тоифасида бўлиб ўтган Ҳасанбой Дўсматов ва Сакен Бибосинов ўртасидаги жангга ўз муносабатини билдирди.

Эслатиб ўтамиз, ҳакамларнинг қарори билан қозоғистонлик боксчи ғалаба қозонди — 0:5 (28:29, 28:29, 28:29, 27:30, 27:30).

«Назаримда, Бибосиновга қарши жангда ҳакамларнинг баҳолари борасида Ҳасанбой Дўсматовга омад кулиб боқмади. Бу савия борасида бир-бирига яқин боксчиларнинг ўзаро жанги бўлди. Унда исталган спортчи ғолиб чиқиши мумкин эди. Ўзбекистонлик спортчи иккинчи раундда яққол ғалаба қозонди (аммо ҳакамларнинг 3 нафари иккинчи бўлимда устунликни Бибосиновга берди — Stadion.uz изоҳи). Сакен эса учинчи раундда устунликка эришди. Барча нарса биринчи раундда ким ғалаба қозонди, дея ҳисоблашингизга боғлиқ.

Бибосинов зарбаларининг аксарият қисми рақиб қўлқопига тегди ёки мўлжалга аниқ бормади, аммо у Дўсматовнинг хук зарбалари ноаниқ чиқишига мажбур қилди ва бир нечта ақлли ҳаракатларни амалга оширди. Аммо Ҳасанбой дастлабки 2та раундда ҳақиқий муваффақиятга эришди.

Дўсматов биринчи бўлимни ишончли бошлади, аммо Бибосинов раунднинг сўнгги дақиқасида ўзига келди. Натижада 4 ҳакам ўз баҳосини унга берди. Ҳар қандай ҳолатда ҳам ҳозирча бу мусобақадаги энг яхши жанг бўлди. Афсуски, улар илк босқичдаёқ тўқнаш келиб қолишди», — дея ёзди журналист твиттер орқали.