Эрлинг Холанд “Боруссия Д”да узоқ вақт қолиши даргумон. Қишда қайсидир бой топ-клуб уни сотиб олиши мумкин. Норвегиялик футболчига давогарларнинг аксарияти Премьер-лигада аъзолари ҳисобланади ва ҳужумчи учун курашда деярли барча жамоанинг имконияти бор. Холанд яқинда қийин танловга дуч келади. “Stadion.uz” нашри эса АПЛнинг норвегиялик учун даъвогар бўлган клублари ҳақида тўхталмоқчи.
“Ливерпуль”
«Қизиллар» - Премьер-лигадаги энг яхши ҳужумкор жамоалардан бири. Жорий мавсумда Юрген Клопп шогирдлари 14 турда 43 та гол уришга муваффақ бўлди - бу лигадаги энг кўп юқори натижаси ҳисобланади. “Боруссия Дортмунд” Бундеслигада голлар сони бўйича иккинчи ўринда: “Асаларилар” 13 ўйинда 33 та гол уришга муваффақ бўлди. Клопп жамоаси ёрқин ҳужумкор ўйин кўрсатмоқда. Шу сабаб Холанднинг ҳужумдаги натижалари топ-5 лигадаги энг яхшиларидан бири: У 70 ўйинда 71 та гол урган. Эрлинг айнан “Ливерпуль”нинг ўйинига мос футболчи эмасми?
“Агар мен “Ливерпуль”нинг ўрнида бўлганимда, уни ҳозироқ сотиб олган бўлардим. Агар у “Ливерпуль”га ўтса, уларда “қотил” ҳужумчи учта бўлади. Менимча, у жамоага мослашишда ҳеч қандай қийинчиликка дуч келмайди”, - дейди Рио Фердинанд.
Дарҳақиқат, “Ливерпуль” кучли босим билан ҳужумкор ўйин кўрсатмоқда. Норвегиялик эса бу услубга мос келади. Ушбу трансфер имкониятидаги асосий муаммо молиявий ҳолатдир. “Қизиллар” “Ман Сити”, ПСЖ ёки “Челси” каби катта пул таклиф қила олмайди, Мино Райола эса ҳужумчи учун катта пул талаб қилмоқда - трансфер нархидан ташқари, ўзи учун 40 миллион евро ва футболчининг отаси учун 20 миллион евро.
“Албатта, мен Холанднинг “Ливерпуль”да бўлишини истардим, чунки у ажойиб футболчи. Эрлинг ажойиб формада ва менимча, у Клоппнинг услубига мос келади. “Ливерпуль”да уни қўлга киритиш имконияти бор ёки йўқлигини билмайман, лекин агар улар буни амалга оширсалар, бу клуб учун ёки уни қўлга киритган ҳар қандай клуб учун ажойиб бўларди!” – деб фикр билдиради мерсисайдликлар собиқ футболчиси Йон-Арне Риисе.
“Челси”
Томас Тухель шогирдлари анча эҳтиёткор тизимда ўйнайди, аммо барибир лондонликлар элита жамоаларидан ажралиб туради. Премьер-лига пешқадами 14 ўйиндан кейин 33 та гол урди. Бу “Ливерпуль”дан кейинги иккинчи энг яхши натижа.
“Биз Эрлинг Холанд ҳақида трансфер ойнаси пайтида бир неча бор гаплашганмиз. Аммо кейин бу мутлақо нореал ва амалга ошириб бўлмайдиган бўлиб туюлди. Биз у ҳақида мунтазам гаплашамиз, чунки у фантастик ўйинчи ва Дортмунд клуби ўйинини аниқ белгиловчи шахс. Келгуси бир неча ҳафта ичида нима бўлишини кўрамиз”, - дея фикр билдиради Тухель.
Лондонликлар молиявий томондан қийинчиликка дуч келмаслиги мумкин. Маошини деярли икки бараварга (йилига 10 миллион еврогача) оширмоқчи бўлган Антонио Рюдигер билан муваффақиятсиз музокаралардан сўнг, клуб норвегиялик учун ажратадиган маблағни оширишга муваффақ бўлди. Ҳужумчи учун “Челси” варианти ҳам ёмон эмас: “кўклар”нинг ўйинидаги устунлик ва ҳужумдаги каруселларга унчалик эътибор қаратмайдиган бўлсак, “Челси” Европанинг энг яхши ҳужумкор жамоаларидан бири, улар шунчаки Тухелнинг кўрсатмаларига мувофиқ ҳаракат қилишади. Бундан ташқари, Германия чемпионатининг бир нечта футболчилари аллақачон Лондонга келишган: Кай Хаверц, Кристиан Пулишич ва Тимо Вернер.
“Манчестер Юнайтед”
“Қизил иблислар”нинг Ҳоланд билан шартнома имзолаш имконияти мураббий алмашганидан кейин кескин ошди. Оле-Гуннар Сульшер қўл остида деярли ҳеч ким “Манчестер Юнайтед”ни 21 ёшли “гол машина”сига номзод сифатида қабул қилмаган: ўйинчи ва мураббий ўртасидаги муносабатлар яхши бўлишига қарамай (Сульшер “Мольде”да Эрлингга устоз бўлган), ўйин ва натижалар туфайли “Манчестер Юнайтед” дунёнинг энг зўр ҳужумчиларидан бири учун умуман қизиқ эмас эди.
Ральф Рангник келиши билан вазият ўзгарди. Эрлинг айнан “Ред Булл Зальцбрг” сафида фаолиятини юқори чўққисига чиқа бошлаган. Клуб сафида барча мусобақалар доирасида 27 ўйинда 29 та гол урди ва 2019/20 йилги мавсумнинг ярмида Австрияни Дортмундга алмаштирди. Рангник норвегияликка “Мольде”дан “Зальцбург”га кўчишида бош-қошлик қилди. Ральф ўша пайтда “Лейпциг” спорт директори эди. Бундан ташқари, Рангник футболчининг отаси Алф-Инге билан илиқ муносабатда.
“Ўйлашимча, кўплаб мухлислар қатори мен ҳам Оле-Гуннар Сульшер билан яхши муносабатда бўлгани учун уни “Манчестер Юнайтед”да узоқ вақт бўлишини кутгандим. Улар бир-бирларини яхши билишади, лекин негадир бу амалга ошмади. Балки Рангник ниманидир таклиф қилиши ва Холандга ўхшаган футболчини олиб келиши мумкин. Ўйлайманки, бу катта сенсация бўлади”, - деди “Манчестер Юнайтед”нинг собиқ бош мураббийи Рене Мёленстен.
“Манчестер Сити”
“Шаҳарликлар” Холанд учун қизиқарли вариант. Бир томондан, янги топ-ҳужумчига эга бўлган клуб енгилмас бўлиб қолиши мумкин, бироқ иккинчи томондан, норвегияликнинг Пеп Гвардиола тизимига қандай интеграциялашуви аниқ эмас.
“Агар Холанд “Ливерпуль”га ўтса, Салоҳ унчалик кўп гол уради деб ўйламайман. Ушбу ҳолат ақл бовар қилмайдиган натижа бўларди, аммо менимча, унинг кейинги клуби “Манчестер Сити” бўлиши мумкин. У “Манчестер Юнайтед”га мос келмайди деб ўйламайман. Аммо, Холанд “Ливерпуль”нинг ўйинига мос келишига ҳам ишончим комил эмас. Шахсан менимча, у “Манчестер Сити”га ўтади, - деди Майкл Оуэн.
“Ман Сити” мухлислари Жек Грилишнинг келишини ҳам интиқлик билан кутган эди, аммо ҳозирча 100 миллионлик инглиз футболчиси барча турнирларда атиги бешта гол урган. Эндиликда “шаҳарликлар” умуман марказий ҳужумчисиз ҳаракат қилишяпти. Пепнинг ҳужумкор ижрочилари нафис комбинацияларни яратадилар.
Премьер-лиганинг энг юқори жамоларидан ташқари, ПСЖ ҳам Холандга даъвогарлик қилмоқда, аммо парижликларнинг ягона умиди - пул. Ўйин нуқтаи назаридан, Париж клуби узоқ вақтдан бери Чемпионлар лигасини ютиш учун йиғилган юлдузлар “ахлатхона”сига айланган. “Реал Мадрид” норвегияликни ҳужумда асосий вариант сифатида кўрмаяпти. Клуб Килиан Мбаппе билан анчадан бери музокара олиб бормоқда. Демак, биз Эрлингни Премьер-лигада кўришимиз мумкин.
