«Энергетик-БГУ» футболчиси Бобир Абдихолиқов Ўзбекистон кубоги финали ҳақида ўз фикрларини билдирди.

«Кубок финал учрашувини «Динамо» стадионидан томоша қилдим. «Насаф» тарбияланувчисиман, албатта уларни қўллаб-қувватлаш учун келган эдим.

Лекин финалнинг бундай даражада тантанали ўтиши ҳаёлимга ҳам келмаган эди. Ташкилотчилар катта иш олиб боргани кўринди.

Кубокнинг автобусда Самарқанд бўйлаб сайри, Регистон майдонидаги кубок билан фотосессия, концерт дастурлари, футболчилар майдонга чиқиб келишидан олдин ўтган тадбирлар — барчаси юқори даражада бўлди.

Аввалги йиллар фақатгина футбол учрашувини томоша қилар эдим. Энди эса учрашув атрофидаги тадбирларга ҳам қизиқишим ортди.

«Насаф»нинг барча мухлисларини ушбу ғалаба билан табриклайман. Жамоа камбек қилиб, ўз иродасини намойиш этди ва ғолибга айланди. «Насаф» бунга лойиқ эди», — дейди Абдихолиқов.