"Лестер" ярим ҳимоячиси Юри Тилеманс "Арсенал"га ўтиши мумкин.
Лондон клуби бош мураббийи Микел Артета трансфер ойнаси ёпилгунига қадар ярим ҳимоячилар сафини кучайтиришни истамоқда, дея хабар беради Goal. 24 ёшли футболчининг агенти билан илк музокаралар аллақачон ўтказилган.
Олдинроқ "Лестер" бош мураббийи Брендан Рожерс Тилеманс жамоани тарк этиши мумкинлигини тан олганди.
Тилеманс “Лестер Сити”да 2019 йилнинг июльидан бери тўп суради. Transfermarkt.com сайтида 24 ёшли футболчининг нархи 55 миллион еврога баҳоланган ва унинг “Лестер” билан шартномаси 2023 йилнинг июньигача тузилган.
2021/22 йилги мавсумда бельгиялик футболчи “тулкилар” сафида 23 та ўйинда майдонга тушиб, 6 та гол ва 3 та голли узатмага муаллифлик қилган.
