Мадриднинг «Реал» клуби яримҳимоячиси Кака АПОЭЛга қарши Чемпионлар Лигаси чорак финал жавоб учрашувидан сўнг ўз фикрларини билдираркан, «Бавария» билан бўлажак яримфинал ўйини бўйича имкониятларни ҳам баҳолади. Бу ҳақда УЕФА расмий сайти хабар бермоқда.

«Реал» – АПОЭЛ учрашуви 5:2 ҳисобида испан клуби фойдасига ҳал бўлди. Кипрда бўлиб ўтган дастлабки баҳсда ҳам мадридликлар 3:0 ҳисобида ғалаба қозонишган эди. Жамоа мусобақа яримфиналида Германиянинг «Бавария» клубига қарши тўп суради.

«Мен ўзимнинг классик голимни уришга муваффақ бўлди. Бу – узоқдан йўлланган зарба. Бугунги ўйинда эртами-кечми шундай гол уришимга ишончим комил эди. Ҳаммаси биз учун яхши ўтди», деди бразилиялик футболчи.

«Реал» АПОЭЛ ва ЦСКАни ишонч билан ортда қолдирди. Бу баҳсларда муносиб ўйин кўрсатдик. Энди бизни «Бавария» кутиб турибди. Бу жуда ҳам жиддий рақиб бўлиб, сўнгги йилларда кетма-кет барқарор юқори натижаларни кўрсатиб келмоқда. Мисол учун, икки йил аввал улар Чемпионлар лигаси финалида «Интер»га қарши тўп суришган», деди Кака.

«Бироқ биз яхши тайёргарлик кўрганмиз ва ўзимизга ишонамиз. Ўйлашимча, жамоамиз финалга чиқишни уддалай олади. Бизда ақлбовар қилмас ҳужум чизиғи бор. Эртами-кечми улар ҳисобдаги керакли натижани қайд эта олишларига ишониш керак», деди «Реал» яримҳимоячиси Кака.