“Рома”нинг кечаги “Женоа”га қарши ўйини Моуриньонинг курсисини қаттиқроқ қимирлатиб юборган бўлса ажабмас. Римликлар сўнгги пайтларда намойиш этаётган ўйинда мазмун йўқ, жамоа ўйин давомида жуда кўп зарба беради, аммо зарбаларнинг 80-85 фоизи ноаниқ.
Бугунги матчда кўрганимиз Дзаньоло ва Эль-Шааравиларнинг эгоистлигими ёки Жозедан шундай кўрсатма бўлганми, буёғи бизга қоронғу. Маълум нарса шуки, футбол жамоавий ўйин ва унда икки ё уч футболчининг зарбалари билан ютиб бўлмайди. Агар шундай бўлса ҳам, бу катта эҳтимол билан тасодифий ёки омад билан боғланадиган голлар бўлади. Моур қайсар шахс. Ўз услуби ва принциплари “ўтмаслашиб” колганини ҳеч қачон тан олмайди.
Бугунги нурсиз дуранг сабаб Рим жамоаси еврокубоклар учун курашдаги имкониятларини ёмонлаштириб юборди. "Рома" 9 февраль куни “Интер" меҳмони бўлади. Бу ўйин португалиялик мутахассис учун ҳақиқий имтиҳон бўлишига шубҳа йўқ.
* * *
Бугун Абрахам ўзини яхши томондан кўрсата олмади. Етмагандек жамоадошининг голи у сабаб бекор қилинди. VAR орқали голи бекор бўлган Дзаньоло бунга чидай олмай, “қизил” билан майдонни тарк этишга қарор қилди. Захирадан ўйинга қўшилган Афена-Гьян ҳам оддий вазиятларда тўпни йўқотди, ўйинни кучайтира олмади. Эль-Шаарави эса имкон бўлиши билан тўпни фақат осмонга тепди.
Қисқа қилиб айтганда, “бўрилар”нинг ҳужум чизиғи вакиллари бугун Моуриньонинг юзини ерга қаратишди.
