Ёқимли «Аякс» ва жанговор «Бенфика». Бу ўйинга унча эътибор бўлмади, афиша ёрқин эмас. Бироқ «Аякс»нинг натижаларини кузатиб бораётганлар кўп нарса кутишга хақли эди. Шундай бўлдиям. «Бенфика» голли отишмага розилик берди.

Душан Тадич бошлади — 0:1. Йўлидан чиққанга гол ураётган ва рекордлар қайд этаётган Себастьен Аллер ўз дарвозасига ҳам тўп киритишдан тийила олмади, 1:1. Аммо 3 дақиқада ўзига келгач, бориб рақибга ҳам гол уриб келди, 1:2. «Аякс» янада ҳисобни ошириши мумкин эди, фойдаланмади. Хавфли зарбаларга туриб берган «Бенфика» характер эвазига вазиятни ўзгартирди. Яремчук ҳисобни тенглаштирди, 2:2.

«Аякс» Чемпионлар лигасининг ушбу мавсумида биринчи бор ғалаба қозона олмади, гуруҳда 100 фоизлик натижа кўрсатганди. Аллер 11 гол уриш учун энг кам ўйин сарфлади — 7 та. Автогол бўлмаганда у энг яхши деб топиларди, лекин бу сафар соврин жамоадоши Мазровийга кетди. Амстердамда «Аякс» фаворит бўлади, деб ўйлайман.

Даврон Файзиев.