«Арсенал» ҳужумчиси Габриел Мартинелли бутун фаолиятини «канонирлар» сафида ўтказишга тайёрлигини айтди.

“Бизда кўплаб ёш футболчилар мавжуд ва олдимизда кўп вақт бор. Жамоада катта ютуқларга эришиш учун зарур фазилатлар бор. Биз бор эътиборимизни Чемпионлар лигасига қаратганмиз ва лигада кучли тўртталикка киришни истаймиз. «Арсенал»дек клуб Чемпионлар лигасида ўйнаши керак.

Биз ҳар доим кўпроқ нарсани хоҳлаймиз. «Арсенал» - катта клуб. Қўлимдан келса, бутун умр шу ерда ўйнайман. Мен шу ерда қолиб, жамоадаошларим ва ажойиб мухлисларимиз билан чемпионликни қўлга киритишни истайман», - деди Мартинелли Goal портали билан суҳбатда.

Мартинелли «Арсенал»да 2019 йилнинг июлидан бери тўп суради. 2021/22 йилги мавсумда 20 ёшли бразилиялик «канонирлар» сафида 23 та ўйинда майдонга тушиб, 4 та гол ва 3 та голли узатмага муаллифлик қилган.