"Интер" Иван Перишич билан шартномани узайтириш борасида музокара олиб бормоқда. Бу ҳақда журналист Никола Шкира ўзининг Твиттер саҳифасида хабар берди.
Манбага кўра, хорватиялик футболчига йилига 5 миллион евро маош билан 2024 йилгача мўлжалланган шартнома таклиф этилади. 33 ёшли вингер дўсти Марсело Брозович ўйнаётган "Интер"да қолишни истайди. Иваннинг "нерадзуррилар" билан амалдаги шартномаси 2022 йилнинг ёзида якунига етади.
Жорий мавсумда Пересич "Интер" сафида барча мусобақаларда 37 та ўйинда майдонга тушиб, 5 та гол урди ва 3 та голли узатмани амалга оширди.
