"Барселона" Гави ва Рональд Араухо билан музокараларда жиддий ўзгаришлар қилмоқчи эмас.
Diario Sport хабарига кўра, Каталония клуби раҳбарлари бу футболчиларнинг жамоа учун қанчалик муҳим эканини билишади, бироқ улар футболчиларга катта маош таклиф қила олишмайди.
"Барселона" аниқ позициясини эгаллаган: ўйинчиларга юборилган янги шартнома таклифларида фақат кичик ўзгаришлар бўлиши мумкин.
Каталония клуби ҳали ҳам оғир иқтисодий аҳволда. Жоан Лапорта ўзидан олдинги президент Хосеп Бартомеунинг хатоларини такрорлашни ва маошларни ошириб юборишни истамайди.
"Барселона" Гави ва Араухо жамоада қолишни истаса, лойиҳанинг спорт томонига эътибор қаратишлари керак деб ҳисоблайди. Жамоа уларга бошқа клублар таклиф қилганидек пул тўлай олмайди.
Қайд этилишича, футболчиларнинг ўзлари қолишни истамоқда.
Хабар қилинишича, уругвайлик ҳам, испаниялик ҳам айни дамда "кўк-анорранглилар"нинг сўнгги таклифларини рад этишган.
