Бугун бўлиб ўтадиган "Барселона" ва "Челси"" ўртасидаги учрашув олдидан таҳририят ходимлари ва бир қатор журналистларнинг фикрлари билан қизиқдик. Кун давомида бу фикрларни сизларга бериб борамиз.

Қаҳрамон Асланов (журналист, "Стадион" газетаси): 

"Бугунги ўйин ҳақида мунозара қилинганда, "Челси"нинг таркиби ёки тактикаси ҳақида гапиришдан маъно йўқ. Ҳаммаси, "Барселона" вазиятлардан фойдалана оладими ёки йўқми, шунга боғлиқ. Чунки “Челси”да ҳужум қилиш ва гол уриш учун вазиятлар бўлишига ишониш қийин.

Албатта ҳар  қандай ўйинда ҳар қандай жамоада ғалаба қозониши мумкин бўлган бир нечта сабаблар бўлади. "Челси" футболчиларининг тажрибаси, бу бир. Стандарт вазиятлар, бу икки. Лондонда қайд этилган ҳисоб, бу уч. Ҳисоб "Барселона" учун шунчалик қалтиски, ҳатто иккита гол уриб ҳам хотиржам бўлишга ҳаққи йўқ. Биргина стандарт ва гол барчасини ўзгартириб юбориши мумкин. Бўлди.

Бундан бошқа "Челси" рақибига қарши футбол томонлама ҳеч нарса қўя олмайди. Жамоаларнинг бугунги ҳолатида жуда катта фарқ бор. Айнан юқорида айтганим, ҳисобнинг қалтислиги “Барселона”нинг ҳар қандай ҳолатда концентрацияни йўқотмаслигини таъминлайди ва кўпроқ гол уришга ундайди. "Камп Ноу" да мезбонларнинг ўйини қовушиши шубҳасиз, агар вазиятлардан тез ва унумли фойдаланилса, тахминимча, йирик ҳисоб қайд этилади. Камида 3-4 та гол уришса керак"