Ўзбекистон миллий жамоаси бош мураббийи Сречко Катанец Navruz Cup-2022 мусобақасининг ярим финал босқичи доирасидаги бўлиб ўтган Қирғизистонга қарши ўйин (3:1) борасида ўз фикрлари билан ўртоқлашди.

"Ўйин ҳақида қисқача фикр билдирадиган бўлсак, бугун Ўзбекистон яхши ўйин кўрсатди. Футболчилар интенсив ўйин намойиш этишди. Учрашувдан қониқиш ҳосил қилдим. Иккинчи бўлимда темпни оширдик ва ғалаба қозондик.

Биринчи бўлиб ўткизиб юборилган гол бир муддат ўйинчилар учун шок ҳолатни юзага келтирди. Бу нормал ҳолат. Футболда ҳар қандай вазият юз бериши мумкин. Ўзбекистон терма жамоаси аъзоси сифатида шуни айтишим керак, ўйин бошиданоқ жамоадан кўп нарса кутиб юбормаслигимиз керак. Масалан, Италия терма жамоаси ютқазиб қўйди. Шунақа натижалар ҳам бўлиб туради. Бу футбол. Ҳозир футбол осон эмас. Аввалгидек 78:0 каби ҳисоблар бўлмайди. Футбол тез ривожланмоқда. Биз ҳар қандай жамоага қарши жиддий муносабат билан ўйнашимиз керак.

Майдон яшил кўрингани билан бир кунда иккита баҳс ўтказилгани учун чимнинг ҳолати яхши эмас. Ҳа, майдон туфайли хатолар юз бериб турди. Аммо майдонни баҳона қила олмаймиз. Яхши ўйин намойиш этиб, ғалаба қозондик.

Ҳамробеков ва Шукуров ўртасида мувозанат топиш керак. Агар ортда бир ҳимоячи қолса, улар мудофаага ҳам ёрдам бериши керак бўлади. Шунинг учун икки таянч ярим ҳимоясини олдинга ўтказа олмаймиз. Бундай ҳолатда ўйинни бузиб қўямиз. Бугун йўл қўйган хатоларимизни биламан. Одил ва Отабек — тажрибали ўйинчилар. Мен уларга ишонаман. Улар ҳозирда ўз позициясида энг яхши ўзбек футболчилари ҳисобланади. Тажрибасиз ўйинчиларни бу позицияга ҳозирча қўя олмайман.

Биринчи навбатда кеча айтиб ўтиб айтганимдек, доимо натижа учун ўйнаймиз. Ўртоқлик учрашувида терма жамоага бунчалик босим уюштирилиши тушунмайман. Ҳа, натижа муҳим, аммо ўртоқлик ўйини ютқазиб қўйсак ҳам бу нормал ҳолат ҳисобланади. Терма жамоани ҳар қандай ҳолатда қўллаб-қувватланиши керак. Футболчилар мухлисларнинг қўллаб-қувватланишини ҳис қилиши керак. Мухлисларнинг баъзи ҳайқириқларидан бугун майдонда Ўзбекистон миллий жамоаси ўйнадими ёки "Навбаҳор" ўйнадими, яхши тушунмай қолди. Стадионга ташриф буюрган ҳар қандай ишқибоз терма жамоани қўллаб-қувватлаши лозим", — деди Катанец.