Италиялик таниқли мутахассис, айни пайтда Парижнинг "ПСЖ" клубини боқараётган мураббий Карло Анчелоттининг фикрича, омадсиз мавсум асло "Барселона" даврининг тугаганини англатмайди.
"Қачонки Месси, Хави, Иньеста ва бошқалар кетмас экан клубнинг даври тугаганини айтиб бўлмайди. Аминманки, "Барселона" аввалгиларига нисбатан янада кучли жамоа сифатида қайтади, — дея Анчелоттидан иқтибос келтирмоқда Goal.com. – Эҳтимол, жамоа чарчаб қолгандир, чунки унинг рақиблари ҳам кучайди. "Реал" ушбу мавсумда яхшироқ эди ва "Камп Ноу"да ҳақли равишда ғалаба қозонди".
"Милан" ва "Челси"нинг собиқ бош мураббийи "Барселона"нинг етакчи футболчиси Лионель Месси ва мураббий Хосеп Гвардиола ҳақида илиқ гнаплар айтиб ўтди.
"Месси формада эмас, чунки у ярим финалда пенальтидан гол уролмади, дейишяпти, бироқ жаҳоннинг энг яхши футболчисини танқид қилиш бемаънилик. Гвардиола – буюк мураббий, у ниманики ютиш мумкин бўлса ҳаммасини қўлга киритди. У жаҳонга ўз ўйин фалсафасини тақдим этди, нега энди у ўзгариши керак?" — деди Анчелотти.
