“Пахтакор” клуби бош мураббийи сифатида ишлаган ҳамда Ўзбекистонда қатор совринларни ютган тажрибали мутахассис Шота Арвеладзени сизларга ортиқча таништиришнинг ҳожати йўқ.

Айни пайтда у Англия чемпионшип мусобақасида “Халл Сити” клуби бош мураббийи сифатида фаолият олиб боряпти.
Шота Юстинович юртимизда ишлаган кезларида табиийки, “Андижон”га қарши бир неча бор тўқнаш келган. Арвеладзе андижонликлар борасида ўзининг маслаҳатлари ва тавсияларини айтди.

- Ўта узоқда туриб ва биринчиликдаги вазиятдан бехабар ҳолда сизнинг жамоангиз ҳақида гапириш мен учун қийин. Шундай бўлса ҳам бир қанча маслаҳат ва фикрларимни айтиб ўтмоқчиман.

Асосийси, барқарорлик ва нима қилиш кераклигини билиш. Қанчалик тез ва қандай қилиб вазифаларни бажара оладиган клубни шакллантириш мумкинлигини англамоқ даркор.

Жамоанинг нимани исташини билиш, уни молиялаштириш ҳамда қай йўсинда ўйнаши кераклиги муҳим жиҳатлар сирасига киради. Бу йўлда мен “Андижон клубига фақат омад тилайман, - деди Арвеладзе.