Спорт арбитраж суди (CAS) ўзнинг расмий сайтида Россия футбол иттифоқининг 2022 йилги Жаҳон чемпионати саралаш турнирининг плей-офф ўйинларини кечиктириш ҳақидаги апелляциясини рад этиш қарорини эълон қилди.
«Польша, Швеция ва Чехия футбол ассоциациялари Россияга қарши ўйнамаслик қарорини очиқ эълон қилди. Агар Россия терма жамоасига плей-оффда иштирок этишга рухсат берилганида, уларнинг рақиблари техник мағлубиятга учраган бўларди, чунки учрашувлар бўлиб ўтмаган бўларди. Шунда ФИФА мусобақаларининг яхлитлиги жиддий равишда бузилган бўларди», — дейилади CAS баёнотида.
CAS ФИФА ва УЕФА баёнотларига рози бўлди, улар ҳеч қандай давлат Россия терма жамоаси билан учрашув ўтказишга рози бўлишига кафолат йўқлигини айтди.
"Европанинг кўплаб давлатлари Россия шарафини ҳимоя қилувчи жамоаларнинг иштирокларини тўхтатиб туриш қарорини қўллаб-қувватлади, шу боис Россияда ушбу мамлакат терма жамоаси иштирокидаги ўйинлар ўтказилиши даргумон», — дейилади хабарда.
Аввалроқ ФИФА ва УЕФА Россия терма жамоалари ва клубларини номаълум муддатга барча Ҳалқаро мусобақаларда иштирок этишдан четлатган эди. РФИ ушбу қарорлар устидан CASга апелляция берганди.
Эслатиб ўтамиз, 24 март куни Россия терма жамоаси Қатарда бўлиб ўтадиган 2022 йилги Жаҳон чемпионатига чиқиш ҳуқуқи учун плей-офф турнирида Польша термаси билан ўйнаши керак эди.
