"Динамо"-"Шўртан" учрашувини "Динамо" клуби тарбияланувчиси, Озарбойжоннинг икки карра чемпиони ва 16 та гол билан чемпионат тўпурари бўлиб турган Баҳодир Насимов ҳам бевосита стадионда кузатди. "Стадион.уз" фойдаланувчилари учун футболчи билан қисқача интервью уюштирдик.
- Баҳодир, аввало чемпионлик билан табриклаймиз. Озарбойжон чемпионати ҳақида гапириб берсангиз. Савия борасида уларнинг чемпионти кучлими ёки бизники?
- Озарбойжон чемпионати кучлироқ назаримда. Кўплаб жамоаларда бразилиялик легионерлар ўйнашади. Улар намойиш этаётган футбол савиясини таърифлаб ўтиришга ҳожат бўлмаса керак.
- Озарбойжон чемпионатида нечта легионерга рухсат берилади?
- Таркибда етти нафар хорижий легионер заявка қилиниши мумкин. Бунга энг асосий сабаб маҳаллий футболчиларнинг етишмаслигидир.
- Уларнинг еттови ҳам бир вақтда майдонга туша оладими? Ёки майдонга тушиш борасида чекловлар мавжудми, Россия чемпионати сингари?
- Чекловлар йўқ. Бир вақтнинг ўзида бошланғич таркибдан легионерларнинг барчаси ўрин олиши мумкин.
- Мана, кўряпсиз, "Динамо" стадиони сиз ўйнаган пайтлардан буён мутлақо янгича қиёфага келтирилган. Озарбойжонда стадионлар, майдонлар қандай?
- Стадионлари кичик бўлса ҳам, аввало барча ўйинда тўлади. Иккинчидан майдонларининг сифати аъло даражада. Кейин стадионлар кўпчилигининг майсаси сунъий. Бироқ майдон идеал даражада текис бўлганлиги сабабли чиройли футбол намойиш этиш мумкин.
- Бироз оқсаётганга ўхшаяпсиз. Жароҳат олганмисиз?
- Ҳа, чемпионлик раундининг 7-турида "Хазар"га қарши учрашувнинг 12-дақиқасида тўп учун курашиб, тиззамдан жароҳатландим. Шу ўйиндан кейин майдонга тушганим йўқ. Ҳозир даволанаяпман.
- Суҳбат учун раҳмат. Тезроқ тузалиб, тезроқ сафга қайтишингизни сўраймиз. Чунки олдинда Миллий терма жамоамизни муҳим учрашувлар кутиб турибди.
Мақсуд ТЎРАЕВ суҳбатлашди.
