«Барселона» ёзда 7 нафар янги футболчини қўлга киритишни режалаштирмоқда.

Diario Sport хабарига кўра, каталонияликлар бош мураббийи Хави ҳар бир позиция учун иккитадан тенг савияли футболчи бўлишини истайди. Бу йўналишда Матеу Алемани ва Жорди Кройфф ишламоқда.

«Барселона» ушбу ёзда Марк-Андре тер Штеген билан рақобатлашиш учун янги дарвозабон сотиб олмоқчи, марказий ҳимоячи («Челси»дан Андреас Кристенсен бўлиши мумкин), иккита қанот ҳимоячи, ярим ҳимоячи (эҳтимол, «Милан»дан Франк Кьесси клубга қўшилади) ва иккита ҳужумчи.

Бу футболчиларнинг барчасини қўлга киритиш учун «Барселона» ким биландир хайрлашиши керак. Дани Алвеш, Серхи Роберто, Усмон Дембеле, Люк де Йонг ва Адама Траорелар билан шартномалар шу ёзда тугайди. Уларнинг бир қисми билан ҳамкорликни давом эттириш учун музокаралар олиб борилади.

Бундан ташқари, клуб Клеман Ленгле, Самуэль Умтити, Оскар Мингеса, Сержиньо Дест, Рики Пуч, Мемфис Депай ва Мартин Брейтвейтларни сотишга ҳаракат қилади.

Филиппе Коутиньо, Миралем Пьянич, Франсиско Тринкау ва Алекс Колладо ижарадан қайтишади.