«Барселона» бош мураббийи Хави Испания чемпионатининг 34-тури доирасида «Мальорка»га қарши ўйин олдидан жамоадаги жароҳатлар ҳақида гапирди.

«Педри бир неча ҳафтага сафдан чиқди. У ўзини яхши ҳис қилмоқда ва ҳозир мустақил шуғулланмоқда. Пике охирги 2-3 ой давомида муаммоларга дуч келди. Бугун у яна касал ва машғулот ўтказмади. Робертода мушаклар билан боғлиқ муаммо бор. Нико кеча Фати билан тўқнашувда оёғини жароҳатлаб олди. Брэйтуэйтда ковид, Дембеледа эса тонзиллит бор.

Бу ёмон, чунки бизга барча футболчилар керак. Ҳозирда бизнинг жамоада марказий ярим ҳимоячилар кўп эмас, лекин бу футбол. Кеча асосий рақибимиз «Севилья» очко йўқотди ва биз фойдаланишимиз керак», - дея Хавининг сўзларидан иқтибос келтиради Sport.es.

Олдинроқ сон қисмидаги жароҳат туфайли 20 январдан бери майдонга тушмаётган ҳужумчи Ансу Фати майдонга тушиши мумкинлиги ҳақида хабар берилганди.

Ла Лига турнир жадвалида каталонияликлар 63 очко билан учинчи ўринда бормоқда. «Севилья» 64 очко билан иккинчи ўринни банд этган.