"Лилль" вингери Эден Азар янги мавсумда Манчестер клубида ўз карьерасини давом эттириши тасдиқлади-ю, айнан қайси клубда эканлигига аниқлик киритмади.
21 ёшли бельгиялик яримҳимоячини қўлга киритиш учун ўнлаб миллион фунт тўлашга қодир бўлган инглиз клубларининг барчаси ҳаракатда, унинг ўзи эса "Лилл"ни тарк этиши ҳақида узил-кесил қарор чиқариб бўлган.
"Лилл"да Азар олти йил ўйнади энди эса ўз кучини инглиз Премьер-лигасида синаб кўришга аҳд қилган. Икки мавсумдан буён Франция Биринчи дивизионининг энг яхши ўйинчиси сифатида тан олинаётган Эден яқин орада омма унинг танлаган клуби қайси бўлишини билиб олишини айтиб ўтди: бу ё "Манчестер Юнайтед" бўлади, ёки "Манчестер Сити".
"Манчестерга отланганман, буни аллақачон айтиб бўлганман. Сўнгги қарор яқинда қабул қилинади", — деди Азар Франция чемпионати якунларига бағишланган тантанали маросимда.
