"Челси" ярим ҳимоячиси Жоржиньонинг агенти Жоау Сантос мижозининг "Ювентус" клубига ўтиши борасида музокаралар олиб бормаганини айтди.
Эслатиб ўтамиз, Италия терма жамоаси футболчисининг "Челси" билан амалдаги шартномаси келаси мавсум охиригача мўлжалланган.
"Унинг "Челси" билан шартномаси ҳали ҳам бор. Жоржиньо учун устувор вазифа шартномани узайтириш. Афсуски, "Челси" Абрамовичга қарши қўлланилган санкциялар туфайли ҳозирча музокара олиб бора олмаяпти, аммо янги хўжайинлар қўл остида вазият қандай бўлишини кўрамиз", - деди Жоржиньонинг агенти 1 Stadio Radio билан суҳбатда.
Эслатиб ўтамиз, яқинда Жоржиньо УEФА талқини бўйича 2021/22 йилги мавсумда Европанинг энг яхши футболчиси деб топилган эди.
