Усмон Дембеле ПСЖга ўтмайди.
Қанот футболчисида фаолиятини давом эттириш учун иккита йўл бор – ё “Барселона” билан янги шартнома имзолаш ёки “Челси”га ўтиш. Қарор кейинги ҳафтадаёқ қабул қилиниши мумкин. Шу билан бирга, Каталония клуби ниҳоятда пессимистик ва Дембеле янги шартнома имзолашдан бош тортишига ишонмоқда.
Бир муддат “ПСЖ” Усмон атрофидагилар билан мулоқотда бўлди, бироқ Леонардонинг спорт директори лавозимидан кетиши музокараларнинг тўхтаб қолишига олиб келди. Леонардонинг ўзи айнан Дембелени "ПСЖ"га олиб келишни истаётган эди. Парижликларнинг янги спорт директорига айланадиган Луис Кампос жамоа ярим ҳимоясини кучайтиришни устувор вазифа деб билади.
Дембеле дўсти Килиан Мбаппенинг вазиятга таъсир этишига умид қилган ва ҳужумчи "ПСЖ" раҳбариятига унга катта таклиф билан чиқишни маслаҳат беришини хоҳлаган. Бироқ, энди вазият Парижда бошқача тус олган.
Қайд этилишича, "Челси" Дембелега 4 йил муддатга шартнома таклиф қилган ва футболчининг молиявий талабларини қондирган. "Барселона" таклифни оширмади, чунки улар Усмон ҳақиқатан ҳам қолишни истаса, клуб қўйган шартларга рози бўлиши керак деб ҳисоблайди.
