"Рома" "Астон Вилла" ярим ҳимоячиси Дуглас Луис ва "Вулверхэмптон" ярим ҳимоячиси Рубен Невешга қизиқиш билдирмоқда, деб ёзади журналист Николо Скира ўзининг Twitter саҳифасида.
Манбага кўра, римликлар бош мураббийи Жозе Моуриньо улардан бирини трансфер қилишдан манфаатдор, чунки португалиялик мутахассис ярим ҳимоя зонасида "топ" футболчини кўрмоқчи.
Ўтган мавсумда Невеш 36 та ўйин ўтказиб, 4 та гол урди ва 2 та голли узатмани амалга оширди. Transfermarkt портали футболчининг нархини 40 миллион еврога баҳоламоқда. 25 ёшли португалияликнинг шартномаси 2023 йилда якунига етади.
Дуглас Луис ўтган мавсумда "Астон Вилла" сафида 35 та ўйинда майдонга тушиб, 2 та гол урди ва 3 та голга ассистентлик қилди. Transfermarkt портали футболчининг нархини 35 миллион еврога баҳоламоқда. 24 ёшли бразилияликнинг Бирмингем клуби билан шартномаси ҳам 2023 йилда якунига етади.
