2003 йилнинг июнида «Челси» ўз тарихидаги энг катта трансферни амалга оширган. Ушбу трансфер футболчини эмас, балки Роман Абрамовични клубга олиб келганди. Шундан кейин бир неча мавсум ичида Абрамовичнинг чўнтаги кучи билан банкрот бўлаёзган жамоа ҳаётга қайтди. Клуб катта-катта трансферларни амалга ошира бошлади. Дидье Дрогба, Майкл Эссьен, Эрнан Креспо, Михаэль Баллак ҳамда Андрей Шевченко шулар жумласидандир. Бу номлар орқали «Челси» муваффақиятларга эриш бошлади. Бу билан эса дунё футболининг энг яхши юлдузлари эътиборига тушди. Умуман олганда, «Челси»нинг қўли истаганига етарди. Аммо айрим ўйинчилар Лондон клубидан кўра, унинг рақибини танлаган. Масалан, «Манчестер Сити»ни. Қуйида аввалига «Челси»га келиши кутилиб, аммо якунда «Ман.Сити»га йўл олган футболчилар ҳақида гаплашамиз.
Робиньо
2008 йилга қайтамиз. Ўшанда «Челси» катта трансфер арафасида турганди. Бразилия терма жамоаси аъзоси Робиньо Лондонга ташриф буюриши керак эди. Бу учун эса ҳаммаси тайёр, ҳаттоки, 32,5 миллион фунтлик келишувга ҳам эришилган. «Реал»дан келиши керак бўлган ҳужумчини, ўша пайтдаги «Челси» устози бўлган Луис Фелипе Сколари бурни тагидан «Манчестер Сити» оғирлаб кетади. Робиньо «шаҳарликлар» учун илк катта харид эди ва келаси йиллардаги трансферларга дебоча бўлади. Робиньонинг ўзи интервьюларидан бирида юқоридаги воқеани тан олган эди: «Мен "Челси"га ўтмоқчи эдим. Сколари менга муҳтожлигини бир неча бор таъкидлаганди. Шунга қарамай, "Реал" уларни алдади. "Қироллик клуби"га трансфердан аввал "Челси" ўз футболкаларида менинг исмимни ёзиб сота бошлагани ёқмаганди. Ишончим комилки, айнан мана шу арзимаган нарса, ушбу кўчишни барбод қилган».
Робиньо «Манчестер Сити»да кўп қолмайди. У тез орада бошқа жамоага ўтиб кетганди.
Давид Сильва
Робиньони йўқотганидан икки йил ўтиб, «Челси» манчестерликлардан яна бир бор «тарсаки» еди. Испаниялик ҳақиқий жавоҳир футболчи Давид Сильва «Манчестер Сити»га кетди. Ўша пайтда Сильва «Валенсия»да эди. 2010 йилнинг июнь ойида Сильва «Челси»га ўтишни хоҳлаганини тан олади. У бу ҳақида шундай дейди: «Бугун "Челси" сўнгги 5 йилдаги Европанинг энг кучли жамоаси бўлиб улгурди. Келажакда бу жамоа "Реал" каби шуҳратга эришиши учун ҳамма имкониятга эга. Жон Терри, Лэмпард ва Дрогба каби футболчиларни дунёдаги исталган жамоа орзу қилади. Ишончим комилки, "Челси"да ўйнаш мен учун ажойиб бўларди. Бу жамоага ҳавас қиламан».
Силва 2010 йилги Жаҳон чемпионатидан кейин «шаҳарликлар» сафига йўл олади. У Роберто Манчини қўлидаги энг катта қуролга айланди. Қарийб 10 йил вақт давомида Силва «Манчестер Сити»да катта ишлар қилди.
Агуэро
2011 йилда «Манчестер Сити» ўз тарихидаги энг яхши харидни амалга оширган. Ўшанда аргентиналик афсоналардан бири Агуэро жамоага келади. Собиқ «Атлетико» ҳужумчиси туманли Албионга келгач, ҳаммаёқни «остин-устун» қилиб юборди. Агуэро АПЛдаги энг яхши тўпурар мақомига эришган.
«Челси» ана шундай истеъдодни аввалдан кўра билган. 2009 йилда, Агуэро 21 ёш эканида, «Челси» унга оғиз солиб кўради. Бироқ, «Челси» учун футболчининг моаши оғирлик қилган. Кейинчалик, 2011 йилда Абрамович Агуэро учун 40 миллион фунт ажратади. Аммо бир неча ой ўтиб, 50 миллионга Фернандо Торресни харид қилади. Бу қарор эса хато эди. Бугун Торрес эмас, балки Агуэро Англияда қаҳрамонга айланди. Уни бутун дунё таниди. Торрес «операция»си эса муваффақиятсиз якунланди. Агуэрога эса доимгидек «Манчестер Сити» эга чиқди.
ИСМАТОВ Ж.
