«Манчестер Сити» ярим ҳимоячиси Бернарду Сильва фаолиятини «Барселона»да давом эттириши мумкин.

Mundo Deportivo’нинг хабар қилишича, португалиялик футболчи болалик давридан бери каталон клубида тўп суришни орзу қилади.

Ўтган қишда «Барселона» вакиллари Ферран Торрес бўйича музокара ўтказиш учун Манчестерга жуда кўп ташриф буюрган. Шундай ташрифларнинг бирида футболчи «Барса» вакиллари билан учрашган ва жамоага ўтиш истагини билдирган.

Аввалига «Барселона» раҳбарияти буни ҳазилга йўйган. Бироқ бир неча кун ўтиб Сильва «кўк-анорранглилар» вакилидан бирига хабар юборган ва унда тезроқ каталонлар сафига қўшилиш ниятида эканини айтган.

Шунингдек, агент Жорже Мендеш ҳам «Барселона» президенти Хоан Лапорта ва клубнинг қатор раҳбарлари билан бўлган учрашувда Сильванинг бу қизиқишини тасдиқлаган.

Аввалроқ «Манчестер Сити» Бернарду учун 85—95 миллион евро пул сўраши хабар қилинганди.

Ортда қолган мавсумда 27 ёшли футболчи «Манчестер Сити» сафида 50 та ўйин ўтказиб, 13 та гол ва еттита голли узатма муаллифига айланди.