Эртага, 9 июль куни Англиянинг Лондон шаҳрида ҳамюртимиз Исроил Мадримов франциялик Мишель Сорога қарши реванш жангини ўтказади.
Кеча ушбу учрашув олдидан матбуот анжумани ташкил этилди. Унда Исроил Мадримов Лондонга илк бор келганлигини айтиб, чемпионлик унвонига эришиш мақсадида бор имкониятини ишга солишини таъкидлади.
Айтиш жоиз, профессионал бокснинг катта рингида улар иккинчи марта учрашмоқда. Мадримов – Соро ўртасидаги илк жанг ўтган йилнинг декабрь ойида Тошкентда бўлиб ўтганди ва ўшанда Мадримов тўққизинчи раундда техник нокаутга эришганди.
Шунингдек, мусобақа дастурига биноан жанг олдидан Лондон шаҳрининг кенг майдонига ўрнатилган рингда Мадримов бокс ишқибозлари учун очиқ машғулот ўтказди.
Мазкур жараёнларни бевосита кузатиб бораётган бокс бўйича Ўзбекистон терма жамоаси мураббийи Тўлқин Қиличевнинг телефон орқали маълум қилишича, истеъдодли боксчимизнинг Англия пойтахтида намойиш этган очиқ машғулотини юзлаб инсонлар томоша қилди. У билан суратларга тушишди. Дастхат олишди.
Эслатиб ўтамиз, Исроил Мадримов – Мишель Соро жангининг ғолиби WBA унвонига мажбурий даъвогар сифатида эътироф этилади ҳамда биринчи ўрта вазн тоифасида мутлақ жаҳон чемпиони Жермелл Чарло билан баҳслашиш имкониятига эга бўлади.
Жанг кечаси DAZN платформаси томонидан 23:30 да бошланади. Ҳамюртимиз иштирокидаги тўқнашув эса, 00:30- 01:00 лар оралиғига тўғри келади.
