“Удинезе” ва Аргентина терма жамоаси ҳимоячиси Нахуэль Молина “Атлетико”га ўтишга яқин. Бу ҳақда журналист Николо Скира Twitter'да хабар берди.
Манбанинг хабарига кўра, томонлар 2027 йилгача шартнома бўйича келишиб олишган. Битимнинг молиявий шартлари ошкор этилмаган.
Олдинроқ "Удинезе" 24 ёшли футболчини 25-30 миллион еврога сотишга тайёрлиги ҳақида хабар берилганди.
Молина ўтган мавсумда А Серияда 35 та ўйинда майдонга тушиб, 7 та гол урди ва 5 та голга ассистентлик қилди. Унинг “Удинезе” билан шартномаси 2026 йилнинг ёзига қадар амал қилади.