"Интер"нинг собиқ дарвозабони Марко Балотта "нерадзуррилар" чемпионликни қайтариб олишига шубҳа қилмаяпти.
Ўтган мавсумда "Интер" "Милан"дан икки очко ортда қолганди, ундан олдинги мавсумда эса Италия чемпионига айланганди. Ҳозирда "Интер" ва "Милан" 19 тадан чемпионликка эга, аммо улар бу кўрсаткич бўйича Туриннинг "Ювентус" жамоасидан деярли икки баравар ортда қолишди.
"Назаримда, "Интер"нинг базаси жуда мустаҳкам. Ишонаманки, бу клуб кейинги мавсумда ўз сўзини айтади. Айниқса, Лукакунинг қайтиши муносабати билан”, - деди собиқ дарвозабон One Station Radio билан суҳбатда.
Италия чемпионати 13 август куни бошланади, биринчи турда "Интер" клуби меҳмонда "Лечче" билан куч синашади.
