Френки Де Йонг сериали кутилмаган томонга ривожланиш эҳтимоли пайдо бўляпти.

Энг бошидан эслайлик. «Барселона» Де Йонгни сотиб олганда йилига 14 миллион евро маошга келишилган ва шартнома имзоланган.

Аммо орага пандемия тушиб қолгач, клуб молиявий томондан қийналиб қолади ва футболчидан маошни қисқартиришни, орадаги фарқни эса, 2024-2025 йилларда қўшиб тўлаши сўрайди. Френки рози бўлади ва 2020/2021 мавсуми учун 3 миллион, 2021/2022 мавсуми учун 6 миллион олади. Натижада, «Барселона» футболчидан ўтган мавсумлар маошидан 19 миллион евро қарздор бўлиб қолади.

Ҳаммаси ўзгаришсиз қолса, кейинги йилларда клуб маошга қўшиб, ушбу суммани ҳам тўлаши керак, аммо энди, янги футболчилар жалб қилиш учун клуб ҳозирча кимнидир сотиши шарт. Жамоада катта суммага сотилиши мумкин бўлган активлар кўп эмас, Де Йонг шулардан бири ва тайёр харидор бор - «Манчестер Юнайтед».

Инглизлар трансфер суммаси бўйича «Барселона» билан келишиб бўлган. Катта эҳтимол Френки билан ҳам келишув бор. Футболчи Манчестерга ўтишга умуман рози эмаслиги ҳақидаги хабарлар мантиқсиз, акс ҳолда, «Юнайтед» бошқа номзодларни унутиб, шунча пайтдан буён бу трансфер кетидан қувмасди. Де Йонг «Барселона»дан кетмоқчи эмаслиги ҳақидаги позицияни танлагани тушунарли - шундагина «Барселона» футболчини кетишга кўндириш учун эски қарзларни тўлашига тўғри келади.

Бу ҳолатда, каталонияликларнинг ўзини тутиши бироз хунук. Лапорта ҳам, Хави ҳам матбуотда Френки жамоага кераклиги, сотилмаслиги ҳақида бонг уриш билан бирга, унга асосий таркибдан жой тегмаслигига ҳам шаъма қилишмоқда.

Хусусан, Хави яримҳимояга Бускетс, Педри, Гавидан ташқари, Пьянич ва Кессиэни қўшди. Ўзи эса, Френкини ҳимоя марказига қўймоқчи эканини айтмоқда. Кулгили. Гарсия, Пике, Араухо каби вариантлардан ташқари, Кристиенсенни ҳам олиб келган, Кунде билан келишиб қўйган «Барселона» 80 миллионлик футболчининг позициясини ўзгартирадими?

Бу билан Френкини кетишга ундашмоқчи, шу билан бирга, трансфер клубнинг эмас, футболчининг ташаббуси бўлиши керак. Клуб оппоқ. Ва агар Френки кетишни истаса, клуб савдолашишни бошлаши ва ҳув ўша 19 миллионнинг бир қисмидан воз кечишни сўраши ҳам мумкин.

Бундан ҳам қизиғи, агар Френки жамоада қолишни истаса, ҳозирги ойлигининг ярмига кўниши лозим экан. Месси билан боғлиқ воқеалар эсингиздами? Шунда қарз сумманинг «сопи ўзидан чиқади...».

Табиийки, Френки Де Йонг ва унинг агенти маошни пасайтиришга ҳам, қарздан кечишгаям кўнмайди. «Юнайтед» августнинг охиригача кутишга тайёр. Энди эса, масалага профсоюз ҳам аралашган кўринади.

У ҳолда ҳатто, клуб ўз вазифаларини бажара олмагани туфайли шартнома бекор бўлиши, «Барселона» ўша 80 миллиондан қуруқ қолиб, Де Йонг эркин агентга айланиши мумкин.

Албатта, иш унгача бормаса керак. Катта эҳтимол билан, «Барселона» чекинади, ўтган йиллардаги маошларни тўлашга рози бўлади ва ниҳоят трансфер содир бўлади.

Қаҳрамон Асланов.