Роберт Левандовски Мюнхенга "Бавария" билан хайрлашиш учун келди.
Журналист Филипп Кесслернинг ёзишича, бугун эрталаб “Барселона”га ўтган польшалик ҳужумчи Мюнхен клуби базасига ташриф буюрди. Аввалига у “Бавария”нинг кийиниш хонасига ташриф буюрди ва собиқ жамоадошлари билан хайрлашди, кейин клуб мураббийлари ва физиотерапевтлари билан суҳбатлашди.
Шундан сўнг Левандовски “Бавария” спорт директори Хасан Салиҳамиджич билан яккама-якка суҳбатлашди, сўнг клуб бош директори Оливер Кан билан учрашди. Роберт "Бавария" музейига ҳам ташриф буюрди.
Журналист Керри Хоунинг қўшимча қилишича, Левандовски “Бавария” базасини тарк этар экан, кираверишда турган бир қанча мухлислар “Hala Madrid” деб бақирган. Бунга жавобан ҳужумчи қўлини машина ойнасидан ташқарига чиқариб, бош бармоғини кўрсатган.
