Cоcа-Cоlа Суперлиганинг 11-туридан қолиб келаётган “Сўғдиёна” — “Пахтакор” учрашувига Жиззах шаҳри мезбонлик қилади.
Аввалроқ давлат тест имтиҳонлари сабаб “Сўғдиёна” томони учрашувни Жиззахдаги марказий стадионда қабул қила олмаслиги маълум қилиб, учрашувни Олмалиқ шаҳрига кўчиришни сўраб мурожаат қилганди. Самарқанд варианти эса бир кун кейин 11-турнинг қолдирилган яна бир учрашуви бўлиби ўтиши сабаб, амалга ошмаганди.
Мавсумнинг марказий ўйинларидан бирини Жиззах шаҳрида ташкил этиш борасида вилоят ҳокимлиги ҳамда “Сўғдиёна” футбол клуби охиригача ҳаракатда бўлди. Якунда томонлар Давлат тест маркази билан келишувга эришди. Эндиликда ўтган мавсумни дастлабки икки ўринда якунлаган клублар иштирокидаги учрашув 6 август куни Жиззахда ўтади. Беллашув соат 19:00 да старт олади.
Ўзбекистон Профессионал футбол лигаси ҳар қандай жамоа ўз мухлислари кўз ўнгида тўп суришидан манфаатдор эканлигини эслатиб ўтамиз ҳамда футбол мухлисларидан бизга боғлиқ бўлмаган янгилик ва ўзгаришларни ни тўғри талқин қилишларини сўраймиз. Ишонамизки, 2023 йилги мавсумдан бошлаб давлат тест имтиҳонлари аввалгидек стадионларда ўтказилмайди ва бизда футбол учрашувларини ўтказиш билан боғлиқ муаммо юзага келмайди.
Айни вақтда “Спорт” телеканали ижодкорлари Олмалиқда ўтиши режалаштирилган учрашувнинг Жиззахга кўчганидан келиб чиқиб, жонли трансляция режаларини Жиззахдан амалга ошириш устида ишлаяпти.
