"Барселона" барча янги келганларнинг муваффақиятли рўйхатга олинишига ишонади.
Каталонияликлар Ла Лиганинг шанба куни бўлиб ўтадиган "Райо Вальекано"га қарши ўйинига футболчиларни рўйхатдан ўтказишлари мумкинлигига ишончи комил, деб хабар беради Diario Sport.
"Блауграна" аллақачон лигага керакли ҳужжатларни юборган ва чемпионат раҳбарияти билан яхши алоқада. "Барса" раҳбарияти Хавига барча янги футболчилар биринчи даврада майдонга тушишини маълум қилган. Клуб ҳам ўз футболчиларини ҳаммаси жойида бўлишига ишонтирди.
Жума куни барча масалалар ҳал бўлиши, янги келганлар эса шанба куни расман рўйхатга олиниши кутилмоқда.
Ёзги трансфер ойнасида "Барселона" Роберт Левандовски, Франк Кессиэ, Андреас Кристенсен, Рафинья ва Жюл Кундени ўз сафига қўшиб олди. Қолаверса, Усмон Дембеле ва Серхи Роберто расман янги келганлар саналади, чунки улар олдинги шартномалар муддати тугаганидан кейин янги шартномалар имзолаган.
