Криштиану Роналду АПЛ 2-тури доирасида "Брентфорд"га қарши ўйинда (0:4) "МЮ"нинг энг яхши ўйинчисига айланди.
"Манчестер Юнайтед" футболчиларининг ушбу ўйиндаги ҳаракатларига баҳо берган Manchester Evening News шундай деб ҳисоблайди.
Ҳимоячилар Люк Шоу ва Лисандро Мартинес, шунингдек, ярим ҳимоячи Фред 10 баллик баҳолаш системасида 0 балл олишди. Бу футболчиларнинг барчаси танаффусда алмаштирилди.
Дарвозабон Давид Де Хеа, ҳимоячи Гарри Магуайр, ярим ҳимоячилар Кристиан Эриксен ва Бруну Фернандеш, вингер Жейдон Санчо ва ҳужумчи Маркус Рэшфорд бир баллга лойиқ кўрилди. Ҳимоячи Диогу Далотнинг ҳаракатлари икки очко билан баҳоланди.
Биринчи дақиқалардан майдонга тушганлар орасидан "МЮ"нинг энг яхши футболчиси Криштиану Роналду бўлди. Унинг ўйини уч очко билан баҳоланди.
Ўйин давомида захирадан майдонга тушган ўйинчилар Тирелл Маласиа ва Рафаэль Варан беш очкодан олган бўлса, ярим ҳимоячи Скотт Мактоминей ва вингер Энтони Эланга тўрттадан очко олди. Донни ван де Бек майдонда кам вақт ўтказгани учун баҳоланмади.
"МЮ" бош мураббийи Эрик тен Хаг эса 2 баллга лойиқ кўрилди.
