"Барселона" Ла Лиганинг 2-турида "Реал Сосьедад"ни 4:1 ҳисобида мағлуб этди.

Учрашувдаги биринчи гол 45-секунддаёқ Роберт Левандовски томонидан киритилди. Алехандро Бальденинг узатмасини польяк голга айлантирди.

"Сосьедад" ўйинга тезда қайта олди - 6-дақиқада Александр Исак тезликда "Барса" жарима майдончасига ёриб кирди ва Марк-Андре Тер-Штегенни устидан нафис ҳаракатлар билан тўпни дарвозага жойлаб қўйди.

Каталониялик мухлислар навбатдаги голни 66-дақиқагача кутишга тўғри келди. Усмон Дембеле томонидан киритилган голга Ансу Фати ассистент бўлди.

Француз дарвозанинг чап узоқ бурчагига кучли зарба билан тўпни жойлаб қўйди.

Ансу битта голли узатма билан тўхтамади. Иккинчи голдан икки дақиқа ўтиб, Фати яна бир голда иштирок этди: у Педрининг ўтказган узатмасидан сўнг Левандовскига узатма берди ва польшалик узатмани голга айлантирди.

79-дақиқада Фати ўзи гол урди - Левандовскининг оёқ ташқи томони билан "сеҳрли" узатмасидан кейин. Ансунинг голи якуний натижани ўрнатди.

Ўйиндан сўнг Робертга учрашув бош ҳаками Хосе Луис Мунуера Монтеро келиб, ўтган ҳафта ўғирланган (ва қайтариб олинган) соати ҳақида гапириб у билан ҳазиллашди: "Сизга омад тилайман, соатингизга эҳтиёт бўлинг."

Ўз навбатида "Барса" футболчилари ўйиндан сўнг Левандовски ҳақида бир қанча илиқ фикрлар билдиришди.

"Левандовски 34 эмас, 20 ёшга ўхшайди. Унинг иш услуби ва урган голлари ҳайратланарли”, - дейди Педри.

"Бавария"га қарши ўйнаганимизда, мен учун жуда оғир эди. Робертнинг ҳозир бизда ўйнаши жуда ажойиб", - дея қўшимча қилди Дембеле.

Хави якуний мақтовни айтди: “Левандовски ўйинда ўзгаришлар қила олишини ҳамма кўрди. У жамоа учун намуна, Роберт ҳозирги ва келажак футболчиси”.

Энг таъсирлиси польшаликнинг ўйиндан кейинги нутқи бўлди - у "Барса" учун Ла Лигадаги илк голларини бир вақтлар Польша иккинчи лигасида ўйнаган ва дзюдо бўйича Польша чемпиони бўлган марҳум отаси Кшиштоф Левандовскига бағишлаган.

“Бу голларимни тепадан кузатиб турган отамга бағишлайман. Мен ҳар доим янги жамоага гол урганимда шундай қиламан”, - дейди Роберт.