"Манчестер Юнайтед" бразилиялик футболчи Антони учун "Аякс"га учинчи таклифни юбормоқчи. TalkSPORT нашри хабарига кўра, Нидерландия клуби футболчи билан тахминан 102 миллион евро эвазига хайрлашишга тайёр.
Эслатиб ўтамиз, аввалроқ "Аякс" "қизил иблислар"нинг иккита таклифини рад этган, шундан сўнг Антони шахсан ўзи клубдан фаолиятини Англияда давом эттиришига рухсат беришни сўраган эди. Бразилиялик футболчи энди жамоа билан шуғулланмайди ва якшанба куни у Роттердамнинг "Спарта" клубига қарши бўладиган ўйин қайдномасидан жой олмади. Шу билан бирга, "Аякс" раҳбариятида ўз футболчисини сотиш ёки сотмаслик борасида фикрлар иккига бўлинган.
22 ёшли Антони "Аякс"га 2020 йилда Бразилиянинг "Сан-Паулу" клубидан келиб қўшилган эди. Жорий мавсумда ҳужумчи барча турнирлар доирасидаги учта ўйинда иккита гол урди ва иккита голли узатмани амалга оширди. Томонлар ўртасидаги келишув 2025 йилда якунига етади.
