Юртимизда меҳмон бўлиб турган Ҳорватия футболи афсонаси Алёша Асанович бугун Тошкент вилоятидаги “Дўстлик” терма жамоалар маркази қурилиш майдонини кўздан кечирди. Унга ЎФА биринчи вице-президенти Равшан Ирматов ҳамда миллий терма жамоамиз бош мураббийи Сречко Катанец ҳамроҳлик қилиб, мазкур марказдан ўрин оладиган обектлар, хусусан, футболчилар учун меҳмонхона, машғулот майдони ва заллари, стадион лойиҳаси билан таништирди. Ушбу базадан ўрин оладиган замонавий тиббий-тикланиш маркази, кутубхона, ресторан, яшил ҳудуд каби обектлар ҳақида маълумот берилди. Ўз ўрнида Алёша Асанович ва Сречко Катанес мазкур қурилиш-лойиҳаси борасидаги таклиф ва мулоҳазаларини билдиришди.
Шундан сўнг мутахассислар Тошкент шаҳар футбол академиясини кўздан кечиришди. Айни вақтда академияда қурилиш-реконструкция жараёнининг сўнгги босқичи амалга оширилмоқда. Овқатланиш, дам олиш ва тиббиёт хоналаридаги шароитлар, янги биноларни замонавий жиҳозлаш бўйича масъулларга кўрсатма берилди. Академия мураббийлари билан суҳбат ташкил этилиб, келгусидаги режалар муҳокама қилинди. Алёша Асанович ва Сречко Катанец ўқув-машғулот йиғинларини самарали ўтказишда нималарга эътибор қаратиш кераклиги юзасидан ўз тавсияларини бериб ўтишди.