Yurtimizda mehmon bo‘lib turgan Horvatiya futboli afsonasi Alyosha Asanovich bugun Toshkent viloyatidagi “Do‘stlik” terma jamoalar markazi qurilish maydonini ko‘zdan kechirdi. Unga O‘FA birinchi vise-prezidenti Ravshan Irmatov hamda milliy terma jamoamiz bosh murabbiyi Srechko Katanes hamrohlik qilib, mazkur markazdan o‘rin oladigan obektlar, xususan, futbolchilar uchun mehmonxona, mashg‘ulot maydoni va zallari, stadion loyihasi bilan tanishtirdi. Ushbu bazadan o‘rin oladigan zamonaviy tibbiy-tiklanish markazi, kutubxona, restoran, yashil hudud kabi obektlar haqida ma’lumot berildi. O‘z o‘rnida Alyosha Asanovich va Srechko Katanes mazkur qurilish-loyihasi borasidagi taklif va mulohazalarini bildirishdi.

Shundan so‘ng mutaxassislar Toshkent shahar futbol akademiyasini ko‘zdan kechirishdi. Ayni vaqtda akademiyada qurilish-rekonstruksiya jarayonining so‘nggi bosqichi amalga oshirilmoqda. Ovqatlanish, dam olish va tibbiyot xonalaridagi sharoitlar, yangi binolarni zamonaviy jihozlash bo‘yicha mas’ullarga ko‘rsatma berildi. Akademiya murabbiylari bilan suhbat tashkil etilib, kelgusidagi rejalar muhokama qilindi. Alyosha Asanovich va Srechko Katanes o‘quv-mashg‘ulot yig‘inlarini samarali o‘tkazishda nimalarga e’tibor qaratish kerakligi yuzasidan o‘z tavsiyalarini berib o‘tishdi.